Nyoxi a yi phatsami eka xiluva xo vuna
Ti tovi u ti yingisela sesi
Wena u fanaka na nyeleti exibakabakeni
Hikuva u vangama na vusiku
Kambe na nhlekani u nyamalala ku fana na ndzhongho hi nguva ya dyandza
Wena u bombaka ku tlula na nkosikazi yale nghilandhi
Ina ahi ku siveli nakona ahi ku vondzoki
Bomba kambe u nga ti rivali
Nyoxi yi lava laha yinga ta tswonga murhu
Loko lava kulu vaku tshinya wena u thya ra mahonisi
Matende,tihodela,tinkoponi,ti thyavhene na ti hositele
Uswi tiva ku tlula na rintiho ra wena ra sasa-nkambani
Dyana vuntshwa bya wena kambe hi vukheta
I xitoko muni u xi xavisaka xoka xinga heli
I bindzu muni ro hlawula ndluwa eka hove
Hi tlhelo ra ti khasimende ke?
Bindzu ro fambisa hi vamatlharhi ntsena hina hi tiva hogo
Kambe lera ka wena n’wana mhani ra hlamarisa
Loko tinyoxi tipomela xiluva aswi vuli kuri xi xonge ngopfu
Kambe tilava kuxi tswonga xinga se vuna
Loko ti heta ku tswonga ati etleli eka xona
Kambe ti tlhelela emabakwini nile minceleni
Kuya hlayisa swihlenge swa tona
Vavanuna valava uva ncicaka ku fanana ti ndzimana empfuxelelweni
Ku hava na wun’we wo tshuna hi tilo a ku vuta
Kambe va kendla xihungasi ndzhuti wale kaya
Xo rivala mbitsi na nhlomulo ya va tshiveri va vona
Hi siku ra varhandzani vaku humba manu
Hi bikirhi ro rila na xiluva xo pfumala timintsu
Kambe chukele na tiya ava ku xaveli
Hambi eka bikiri ra kona uta virisela dini uta twa mani?
Loko waha khinyaveza xisuti u ntsweketa
Tsundzuka xivuriso xa va vhenda lexi nge:
N’wana wa kondlo anga rivali nkele
Na vavanuna valava loko va sive la ku vavaka
Vata teka ndlela va tlhelela ka vatshiveri va vona
Hakunene nyoxi ya nyenya xiluva xo vuna
Siku u khohlolaka angaku laveli tin’anga kuta ku sawutisa
Kambe u cinca mavala bya rimpfani
Aku leswi swo lava vaka n’wina vanga vinyi va nhloko
Swi tivi kuri se u vunile wena xiluva xa xiphaswa
Se ya haha nyoxi kuya phatsama ka xiluva xa xiluvari
Kumbe xa chochela mandleni
Wena uta sala u phatsamiwa hiva mpela madlekeni
Tinhongana ta rihlaza
- Mashaba Justice